اِک پَرِ خیال "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
' الف'
دورانِ پرواز ، جب جہاز دوشنبہ کو پار کر رہا تھا ،،تو شدید گرج چمک کا نظارہ دم بخود کر رہا تھا ۔بادل ،،اونچی نا قابلِ یقین لہروں کی صورت جمے ہوۓ تھے ۔ لیکن جب بجلی چمکتی تو زرد اور پیلے اونٹوں کا قافلہ بھاگتا محسوس ہوا ۔ دہشت ،، رعبِ الہیٰ ،،اور ہیبت کا مفہوم قدرت کبھی کبھی ایسے ہی فلم چلا کر سمجھاتی ہے ۔
" ب"
جہاز محوِ پرواز تھا ،،، اور زمین دور بہت دور نیچے ہے ،، فضا اور زمین کے درمیان بادل کہیں گھنے ، کہیں چھدرے ، اور کہیں دور دور پھیلے نظر آئے ۔ ایسے محسوس ہوا ، جیسے یہ بادل قدرت کے خفیہ پیغامات پہنچانے کا کام کرہے ہوں ،،،
گھنے بادل ،، جیسے گہری باتیں ، گہرے راز پہنچائے جا رہے ہوں
چھدرے بادل ،،، جیسے سطحی پیام
دور دراز اکا دکا بادل ،،، جیسے پہریدار ، کچھ بھی حکم ملے تو تیز ہر کاروں کی طرح ، گھوڑے دوڑانے کو تیار ۔
پھر زمین یہ پیغامات،،، کہیں امن ، سبزہ ، اور خوشحالی کی صورت ،،،،وصُول کرتی ہے ۔ کہیں بے اطمینانی ، بانجھ پن اور نفس پرستی کی صورت وصُول کرتی ہے ۔۔۔۔ اور ایسے ہی وقت میں اکا دُکا بادلوں کی گرج ، دھڑدھڑاہٹ ، ڈانٹ ڈپٹ کی صورت ، کہ جاگ اے بےخبر! جاگ ، اپنے اس عارضی قیام کا ادراک پہچان ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
'' جیم "
فیروزی اور سلیٹی رنگوں کا امتزاج جب آسمان پر چھایا ہو تو اِسے کون سا رنگ کہیں گے ؟؟؟؟ اُسے کسی نام سے نہیں پکار سکتے ! یہ صِرف ایک نظارہ ، اور الفاظ ختم ،،،،
کہیں جذبوں کی مِٹھاس اور کڑواہٹ کے درمیان بھی عجیب سا جذبہ کار فرما ہوتا ہو تو ،،،، اس احساس کا بھی کوئی عنوان نہیں ہوتا ۔
کتنی عجیب بات ہے ، بلا عنوان بھی لا تعداد چیزیں اور جذبے ہیں ۔
( منیرہ قریشی ، 25 ستمبر 2022ء دورانِ سفرِ زمین و آسمان)
کوئی تبصرے نہیں:
ایک تبصرہ شائع کریں